انت بعيونهم

النظام بخير وسلام

النظام بخير وماكو الا العافية

السالفة وما فيها أن أي صوت غير صوت التصفيق للحكومة يحسبونه البيان رقم واحد

والسالفة بعد ان البعض  لقو ان في خوف الناس وبعض الأطراف في السلطة خوش تجارة واستثمار وفرصة للصعود

كبروا السالفة وصارت الأغاني الوطنية تذاع وتبث طول السالفة

وهناك من صدق ان الكويت بخطر وهناك من حب يصدق انها كذلك

---

تجار الخوف وتوابع الخوافين لقوا في الوضع خوش فرصة للتسلق وهات ياهبش

اللي فلوس واللي منصب واللي صورة تذكارية وكل واحد ووجهده ووزنه

الشيء الأكيد

الشيء الثابت

الشيء اللي دهر قاله وكتبه 

ان حكومتنا عمرها ما تحسب التأييد لها في خانة التقدير

بل في خانة التحقير

مو لأنها جاحدة أو ناكرة جميل حاشا وكلا

ولكن

لأنها ببساطة عارفه نفسها من الداخل - خربانة وتلفانة - ومن يمدحها وهي على هالحال اما خربان مثلها ويبي الأجر أو مقهور من طرف هو خصم مشترك للحكومة وللمقهور اللي يصفق لها بالطالعة والنازلة

---

أخيرا يا من أكتويتم بنار الجفاء الحكومي

ويا من يشاور نفسه أصير حكومي أو معارضة

اخذوها مني

المعارضة تكون للسياسات الخاطئة فقط لا للأشخاص 

والموالاة لا تكون لغير الدستور والناس ومن يعمل لأجلهما

ثبتوا على هالسياسة لا تغيرونها

هذي برمجة وحده وما في لها تحديث

وحتى لما الحكومة تبدأ ببعض الخطوات الإصلاحية - من وين يا خلاف؟؟؟ - اياكم والثناء عليها راح تقط اللي بإيدها وتصدق انها حكومة اصلاحية

ومن الحين لحد ذلك اليوم

لا تقولون محد قال وتكلم ... عن نفسي بقولها وبكلمتين

حكومتنا اليوم وقبل ..... ما تشوفنا غير الأخ اللي في الصورة فوق

موكلينا ومشربينا ومعيشينا معاهم 

ما تحترم اللي يردح تحتها ولا تقدر اللي قاعد برا مخباتها

اختاروا طريجكم

ولا تخافون على النظام ولا تربطون الوطنية بتأييد الحكومة