Monday, May 24, 2010

زمن الخيازين ولى يا هذا

يعني اذا رحت الدوام وانا ناسي الحليب ممكن أمشي حالي؟؟؟

خوش فرصة الشيخ تميم بالكويت .. هجوم يا عيال
---

في الموضوع التالي


التعليق بالأحمر لعاجل

---

ناشد الشيخ صباح مبارك صباح الناصر الصباح ( شفت الناس كلها أنشهرت قلت خل أجرب ) صاحب السمو أمير البلاد أن « يضرب بيد من حديد من يتكلمون عن الأسرة ( ولا ترى راح أزعل ) .. وشن الشيخ صباح المبارك هجوما عنيفا على النائب مسلم البراك خلال مداخلة هاتفية ضمن برنامج « مع الناس » على قناة «سكوب» ( خوش مستوى ما لها غير سكوب وسعود ) ، متسائلا « من يكون العضو؟ هل فعلوا شيئا للكويت؟ إلا جرها للوراء وتدميرها »


وقال ان «فجر السعيد أرفع واشرف امرأة في الكويت » و «عيب الكلام الذي يخرج من هذا النائب »، مضيفا «من وين جاينا محمد الجاسم هذا، رئيس جريدة... أنا أول مرة اسمع عنه» ( صدتصدق نفس السؤال لك ) واستهل الشيخ صباح مبارك الناصر مداخلته بالقول: « نحن نناشد صاحب السمو الأمير الوالد ان يضرب بيد من حديد من يتكلمون عن الأسرة، وأناشد رئيس الوزراء ناصر المحمد وهو يسمعني الآن ان يتكلم مع هلال الساير ما يصير مرضانا يذهبون إلى الأردن وغير الأردن ما يصير ما نقبلها ونحن كأسرة الصباح لا نقبلها الحمدلله حكومتنا موفرة كل شيء والمال موجود والأجهزة موجودة»


وأضاف: «لو كنت في الكويت لرفعت دعوى قضائية عليه ( خلك برا أحسن لك ) »، ويا اخوي سعود انت ما قصرت واشكر محمد الجويهل ( كفوك ) وتقوله لا يعصب لأنه اجرى عملية القلب أخيراً ونشكر الأخت فجر وهي ارفع وأشرف امرأة في الكويت ونشكر عائشة الرشيد ( ليش ما تتزوجها وتخدم البلد ) هذه الإعلامية الطيبة الجريئة ونشكر الأخ محمد الصبر واناشد وزير الداخلية اقوله يا بو نواف اضرب بيد من حديد مو كل هيلق ( هاجم اللي ضفهم اذا تقدر ) يدخل المخفر ويضرب ضباطنا وشرطتنا هذا غلط، يا بو نواف اسمعني أنا صباح مبارك صباح الناصر الصباح ( يا ما ماي ) جدي مبارك الصباح وأبي الله يرحمه مبارك صباح الناصر ( درينا اهيا خطبة ) وعزام اخي بسفارة البحرين ومعروفين صباح الناصر من هم والحمدلله


وعيب هالكلام الذي يخرج من هذا النائب ( شكو أسمك بالموضوع بالنائب ولا بس هذي لزمة ) ويجب عليه ان يحترم نفسه ويحترم معازيبه ويحترم الناس ويحترم سكوب ويحترم الأخت فجر والأخت فجر تاج على راسه يسمع ولا ما يسمع ما همنا نحن الناصر»


وتابع: «نحن من عهد المرحوم الشيخ عبدالله السالم وهو خال الوالد عندما اسسوا الديموقراطية لم يكن هناك من تكلم على الشيوخ ولا سمعنا أحداً يتكلم على الأسرة كان فيه احترام ويخاطبونهم باحترام»


وأضاف: «أنا أناشد صاحب السمو أمير البلاد الشيخ صباح الأحمد اقوله يابوناصر اضرب بيد من حديد احنا مجلسنا كله فوق وفوق يا أخي قصاك عضو ، تتكلم على الاسرة؟ ( مو الأسرة هي اللي تتكلم عن الأسرة ) ومن يكون العضو؟ هل فعلوا شيئاً للكويت ؟ الا جرها للوراء وتدميرها ( أرجع يا بطل وحاربهم ) ، احترم حالك الحمد لله فيه خير وامن وامان شوف بقية الدول لا عندهم امن ولا أمان ونحن في الكويت والحمد لله والله يعز صباح الأحمد عايشين بأمن وامان»


وعن رأيه «في موضوع ازدواجية الجنسية قال الشيخ صباح مبارك أنا ضدها، انا كويتي أو مو كويتي».وعن المطالبة بعزل الشيخ علي جابر الأحمد الجابر الصباح، بعد اعتراضه على المزدوجين، قال: «هؤلاء يقبضون معاشين أو ثلاثة معاشات من الكويت ومن السعودية ( بلغ عن اللي تعرفهم وانت ما شاء واصل وأسمك سبع أسامي ) شلون تقطعون مال السعودية وتنقطع معاشاتهم ؟ ما يصير، حلوين المعاشين انا مع علي قلباً وقالباً، والشيخ علي صادق ماذا يعني جنسيتين؟ انت كويتي او مو كويتي؟»


وأكد «هذه هي الكارثة فهم لايحبون الصدق يحبون الكذب والخرابيط الازدواجية، ما هي زينة بالله صارت حربا لاسمح الله بالكويت، يهربون إلى السعودية، ما يصير، عيل وين مواطنينا والكويتيين وينهم، معاشات يبلعون على الفاضي بس». وفي موضوع محمد الجاسم قال: «محمد الجاسم من وين طلع لينا يا الله ، من وين جاينا محمد الجاسم هذا( من ولد عمك علي الخليفة ) ، رئيس جريدة من هو الجاسم انا اول مرة اسمع عن الجاسم هذا، وهذا فوق شؤونهم يا سعود يخسأون الحكم للصباح ( ومنو اللي ناجرهم ؟؟ ما تدري غير السوباح ما نبي ) والمال العام للشعب والصباح بس ما احد يأخذ شيء »


ورأى أن «محمد الجويهل لا يضرب الوحدة الوطنية ».واختتم: «اسلم على جميع العاملين في سكوب واقول حق الساير ياوزير الصحة فشلتنا ثم فشلتنا ثم فشلتنا ( هو يشتغل عنك ولا عند الأسرة ولا عند الدولة ؟؟ ) مرضى الـ ام اس يذهبون للخارج لتلقي العلاج ونحن عندنا كل الخير في الكويت لماذا؟ ياهلال الساير خلك مضبوط ( ولا ترى بلحقك بهوز ) وخلك وزير محترم ( حاضر عمي ) خل الناس تمدحك مو تذمك ترى احنا قصرنا باليرموك ( مالت على الأسلوب ) جنب بيتك ، عرفت القصر الكبير؟ ( درينا شرايك تحط اعلان بسكوب أسمه بيتي يم بيتك ) وخلك هلال نفس الاسم لا تقلب نفسك علينا( السالفة فيها قلبه بعد ) ، عيب عيالنا يروحون الاردن للعلاج .انت اقسمت على القرآن ان تعمل شوف حالك يا هلال ترى انا واحد معصب عليك بصراحة ( وواصل حدي بعد ) وياليت ما اشوفك قدامي( غير راي راح أقتلك ) الله يرحمك اذا شفتك ، سنع الدولة سنع الصحة المستشفيات ما يصير يا هلال»

41 comments:

Edrak said...

شهل مستويات .. هذا شكل واحد يبي هيبة ؟ زين ما ايشوتونك اهل الكويت من دواوينهم و يبينون حجمك ...

عادل نحتاج مدرسة اتيكيت للشيوخ منها يتعلمون شلون يتكلمون و يكتبون و ما يخلون هل يهالوا يتكلمون بأسمهم يا اخي احنا ما نرضاها و هذا الي تبونه مو هيبة هذي خيبة ... و محد سأل نفسه الشيخ عبدالله السالم ليش الناس تحبه و عطته احترام اكثر من اي شيخ اخر بس المخ مادري شلون يشتغل عند بعض الناس

ولاّدة said...

بالتأكيد ولى

وبما أن شيخ البلاش من متابعي سكوب فأكيد يفهم كلمات طلال السعيد

لذا سأردد على مسامعه بيت للسعيد حتى يفهمني

إدفن الماضي تحت سابع ثرى
خطوة الأيام ما ترجع ورى


وفي زمن الخيازرين تدخل المندوب السامي البريطاني وقال للمسئولين آنذاك
STOP IT
وطبعا
they stopped it
لم يكن لديهم خيار


واليوم في زمن نتابع فيه الرئيس العظيم اوباما على الفيس بوك والتويتر..لا مجال لعودة أيام الظلم

عاجــل said...

Edrak

لم أعد أصدم

بهذا المستوى بتاتا

لقد انكشف الكثيرون امام الميكرفون وكل ما قلنا اكو زينين بس مخشوشين تطبع بلاوي أكبر

يا الله سترك

عاجــل said...

ولاّدة

كنت اظن اننا نبالغ بالمعرفة
لان الجماعة صخة

لكن صج طلعنا نفهم سياسة أكثر من غيرنا

بو ذياب said...

1- عسى ما يالنا ضيف تبتدي الطرارة .. السؤال هل الضيوف قاعدين صج يدفعون ؟
2- اتوقع الشيخ ماكان ابوعيه وقتها وماحط بذمتي :) لان الاسلوب يقول الريال توه مبتدي الجو معاه

عاجــل said...

بو ذياب

الجماعة مو عاتقين
ويبدو ان واحد فيهم غلط فتبعه جيش النمل

bo bader said...

يا حلو السكوت !!

وطني الكويت said...

للاسف هذا المستوي حق بوربع
هذا لو كان من ذرية مبارك شنو يقول
ما اقول اخرس ثكلتك امك

عاجــل said...

bo bader

عادلوه بالذهب

عاجــل said...

وطني الكويت

في هذا الزمن
ما عاد يحتاج تكون أي شيء حتى تسوي أي شي

panadool said...

بالنسبة للإعلانات حق ولى عهد قطر والله فشلة

الكويتيين ماييووزون من الطراره وأشكثرها بالجرايد

شيئ يفشل والله
شنو راح يقول ولى عهد قطر عنا


أما عن مقال الشيخ اللى كاتبه
بصراحة إسلوب هابط شوارعى
وصارت تطلع عندنا مقالات بمستويات غريبه لم نعهدها من قبل



شكرا عاجل

عاجــل said...

panadool

العفو

عاد صج احتاج بندول

المقوع الشرقي said...

ماشالله عليكم مناشبين الريال
قايليله سمو الرئيس قاعد يسمع
فرسم السياسة العامة للدوله ..بثواني

فورييره

عاجــل said...

المقوع الشرقي

يا خوفي لا يكون قاعد يمه وينقله

جبريت said...

هذا فيه مرض نفسي شكله

Q8i said...

نسيت شغله عاجل
" العضو هذا لازم يحترم نفسه ويحترم معازيبه "


عــضو مجلس أمه و عنده معــازيب !!!

ابو قصر جبير قــاضي ومايعرف شنو يعني برلمان و اعضاء وصلوا ب انتخاب
وانهم يمثلون الامه





شهالاشـــكال هــــذه !!


هذا واحد من الثنتين
ياما مو صــاحي وفي وشه

او كان سكران لما اتصل



وبكل الحالات لازم محاسبته من الاسره
حفاظا على سمعة الاسره الحاكمه و وضع حد لامثال هذا المدعي

Q8i said...

سعود الورع

إسم على مــسمى ،، شخص متزلف
منافق ،،،

للامانه

قناة سـكوب تــعرف تــنقي الأشـــكال الـقذره وتصنع منهم متزلفون على الهوى


مادري من وين يطلعونهم سكوب
طبعا مو غريبه على " فجر " تعرف
مكان هالاشكال وين و ترزهم

عثماني said...

ايييييه

زمن اغبر يا خوي

:(

اجار الدين كشمش said...

عاجل

انت المتهم والله .. وليس هو

الصباح اكثر من 3000 شخص وشخصه

ما نقيت الا هذا

لاااااااااازم الاسره ترفع عليك
قضيه وتعويض
50001 دينار

ههههههههه
فمالله

Zaydoun said...

ترى ذرية صباح الناصر ما عليهم شرهة.. معروف عنهم أغلبهم ميانين وجهلة، لا تربية ولا أخلاق

يقولون جدتهم داعية عليهم

ma6goog said...

مواهب جديدة

اتوقع يطلع بمسلسل بو قتادة رمضان الياي

فريج سعود said...

يخرب بيت الاسلوب

الظاهر الي يدق او يروح سكوب تحوشه حالة

جو جو جو اممممممم جو جو اممم جوتي

مالت درب الزلق

ebreeq said...

صراحه مسرحيه

:))))



ياليتنا من حجنا سالمين
:))))



مودتي

حقوقي said...

الحمدالله والشكر
صج اهل العقول في راحة
قال شيخ قال ....

MSMAAR said...

والله زمن تسب وتلفظ بالفاظ نابيه راح تشتهر
طبعا مالها الا سكوب والوثن هم الي يتقبلون هالاشكال

راح اقتلك ياهلال نبي نشوف تطبيق القانون !!

mtfa2el said...

و راح يمر الموضوع كأنه ما صار شي
في زمن دولة المؤسسات والخرطي

أبو الدســتور said...

الله يصبرنا

بــيــض الــخــعــفــق said...

ذكرني بجملة عادل إمام بمسرحية الواد سيد الشغال

الموضوع خرج من إيديا وبأى برجليا

كنت أتمنى إني شايف الحلقة بس ماراح أفهم شي لأن مافيها
subtitle

الله يحفظ الكويت وبس

عاجــل said...

Q8i

لا تترجى محاسبة لانه نطق بلسان أوساطه

عاجــل said...

عثماني

زمن أغبر والجو مغبر وكلام مغبر

الوضع غبرني

عاجــل said...

جبريت

أبدا

هذا حوار القصور المعتاد

لكن احنا ما نسمعه وايد

عاجــل said...

اجار الدين كشمش

انا ما نقيته

هو اللي طلع لي من كل صوب

عاجــل said...

Zaydoun

بديت اخذ فكرة زينة

عاجــل said...

ma6goog

غبراااااااااااا

عاجــل said...

فريج سعود

انت خذ كل الكلام

ورتبه بعدين انا شيخ مو فاضي أصفف حجي

عاجــل said...

ebreeq

كل ما نزلنا اكثر راح نشوف اكثر

عاجــل said...

حقوقي

يازينه ساكت

عاجــل said...

MSMAAR

والله ماهو هالزمن كثر مو ان اللعب قاعد يصير من صوب اللي يملك أكثر

وهو يستخدم هالاسلوب لتكسير الخصوم

عاجــل said...

mtfa2el

كما أتوقع

عاجــل said...

أبو الدســتور

محتاجين وايد

عاجــل said...

بــيــض الــخــعــفــق

صارت متاحة باللغة الصينية