الواقع والنتيجة النهائية هي الطراق اللي نتعلم منه والشاطر هو من يقرأ في تجارب الغير حتى يتعض واللي ما يحب يقرأ ممكن يسأل الناس الفاهمة
والباقي على الله
---
أكثر من مرة يشهق صديق لي - ومن يشهقون زادوا هاليومين - كل ما شاف ندوة حاشدة في فندق أو مكان مليان في مقر لمرشح يفشل الناس المحترمة لو دخل عليهم الديوان أو تصادف معهم في مصعد كهربائي
الصديق الشاهق يقول ... لا بالله شكله ناجح
ولأن الحوار مع ذلك الصديق طال وأيضا تكرر مع غيره سأختصر ردي على وجهة نظره
---
لقد مرت علينا في الإنتخابات نماذج لمرشحين أعطوا الجانب الدعائي في حملاتهم مال قارون ووين ما نروح نلقاقهم طالعين لنا يا ورقة على السيارة يا كتيب داخل صندوق الصحيفة يا داخل الصحيفة نفسها
غير الاعلانات في الصفحة الأولى والأخيرة
اشرطة أيام الأشرطة وسيديات وفلاشات
مقر فخم وأكل وعصاير وشيشة من كل صنف ونوع
شقول شخلي كل شيء
وهالكلام أيام الدوائر 25 يعني سهل هالمرشح يغرق الدائرة بصوره واعلاناته بكل طريق وسكة وعامود نور
علة علة علة
ومع كل هالصيحة ندور مرشحنا الباذخ نلقاه طايح المركز الخمستعش ويمكن أكثر
أفا عيل وين الدعاية؟؟؟ والعيوش؟؟؟
سلامتك السالفة كلها فقاعة اعلامية
---
حسبة الفوز سواء قبل والحين لها مؤشرا كثيرة وهي مو موضوعي اليوم
لكن خل نقول أسرة أو قبيلة كبيرة مع تمويل ممكن
منطق ولسان وسيرة حلوة وعمل متواصل ممكن
تجمع سياسي يدعم وكوادر تشتغل ممكن
السلطة تفتح باب المعاملات وترش رش ممكن حيل
---
الحين نوصل للفقاعة اللي مخوفة الناس خصوصا في الثالثة
مرشحين فجأة
ماشين عكس الطبيعة الكويتية اللي ركعت كل الأحزاب وهي يا تزورني وتوجبني وتفتح ملف عندي بديوانيتي حتى لو كان روادها 3 متقاعدين
يا عمرك ما تشوف الصوت أو حتى أفكر فيك
تعالوا حسبوا كم ديوانية وفوقها كم مجموعة نسائية ممكن الوصول لها خلال كم أسبوع بس؟؟؟؟؟ يمكن بالمئات والأصوات المطلوبة للنجاح
هل حضور المقر المليان أو الفندق يعني أن الحضور من نفس الدائرة؟؟؟ أو أكيد هم مؤيدين وليس متفرجين؟؟؟
كم مرشح من نفس الطينة اللي كلها تبي توصل عشان تسب السعدون أو تطب ببطن الحكومة نازلين في نفس الدائرة؟؟؟ يمكن عشرة يعني الإصوات بتتفرق ستين قطعة
---
خايفين أدري ... أستطلاعات الجاسم مخرعتكم هم أدري ... وأبشركم شكله صاحبنا خايرها حيل هالسنة ويقولون مأجر الموقع على التاجر الوطني الشريف مال نبيها عشرة وحتى لو نفى كما نفى قبل كم يوم هم مو دليل لأنه ممكن يخفي عقد التأجير وهو لا زال بالصورة
---
لا تخافون إلا من كم شغلة مهمة
---
الإقبال على التصويت ... وهذه قلتها في تويتر هذه قضية تستحق أكبر حملة في تويتر وغير تويتر ... لكن محد مهتم ناس مشغولة بمنو الرئيس القادم؟؟؟ ناس تبي تطلع عيوب الشعبي وغيرهم يبي يطلع عيوب الوطني والسلف ضرب بالسلف والإخوان بيموتون بنائب ثاني مع جمعان بأي طريقة واللي مصدقين نفسهم فايزين شاغلين الدنيا بمشاكلهم مع الأشباح
---
أستمرار لغة التصعيد من كتلة المعارضة على حالها وتخويف الناخبين بأن كل شيء سيعود كما كان تصعيد واستجوابات ومن النقطة التي أنتهينا عندها
وهذا الوضع هو ما يغذي قوة بعض المرشحين اللي كثيرين خايفين لا يوصلون المجلس
واحد بيوصل عشان يسب
واحد بيوصل عشان يحقق التنمية لجيبه
واحد بيوصل عشان يحمي أهل السنة من الشيعة
واحد بيوصل عشان يحمي أهل الشيعة من السنة
وتبونهم ما يوصلون بعد
يا جماعة غيروا الخطاب شوية ... ولا خلاص الإنتخابات بعد كم يوم
---
الهجوم على من يعلن أنه يريد التصويت لمرشحي سكوب ... ودي أذكركم ترى أحنا بالكويت ما نعلن حق منو بنصوت الا بعد مدة عشان ما نخسر أحد
اليوم اللي يقولك ترى بصوت حق .... أو ..... أو ..... أو ..... مكرم السامع حتى منالنقط
أعرف أنه يبي أحد يسمع صوته لأن محد سمع صوته من قبل خصوصا المرشحين المشغولين بقضايا شخصية أو خارج حدود الكويت
أعرف أن في احد ما أحترم كلامه أو سبه لانه قال كلام غير مألوف وأنتقد رمز او أي شيء آخر ما عمل شيء له أو لعياله
نعم في ناس عندهم مشكلة مع المعارضة اللي احنا ياما انتقدناها
لأن أسلوبها خلق لنا مشاكل اليوم رغم أن ممول الفتن خرج من المشهد
لكن مو صحيح انك تحارب الخطأ بإختيار الأرذل
يعني معقولة 50 مرشح في كل دائرة ومو لا قي أحد زين؟؟؟؟
---
أختمها ... حاربوا الفقاعة الإعلامية بالمعلومة الصح وليس بالتقليل من رأي الناس
صحيح مو كلهم مناضلين مثلكم صحيح هم ما يعرفون سياسة كثركم
لكن هؤلاء هم الناخبين غصبن علينا وعليكم
ولكن كل واحد فيهم له لغة ومفتاح وقرين
شدوا حيلكم
باقي كم يوم بس
