Saturday, January 09, 2010

ألوووو عصاير شويخ؟؟



قصة من الخيال التدويني

---

قبل كم يوم أجريت هذه المكالمة بالغلط مع رئيس المجلس والنتيجة الوحيدة التي خرجت منها هي ان محل عصاير الشويخ تم تسكيره بسبب أسم عصير

------


عاجل : ألو


الرئيس : ألو نعم


عاجل : ألو عصاير شويخ لو سمحت عطني ليمون نعناع بطل متوسط   


الرئيس : أي عصير ونعناع يوبا الظاهر أنت داق غلط .. بعدين أي مطعم هذا اللي رقمه مثل رقمي ؟ وليش ما عنده رقم ثابت


عاجل : هذا رقم عصاير شويخ وهو ما عنده رقم ثابت وسامحنا على الإزعاج


الرئيس : بسألك هالمحل عصايره زينه يعني تنصحني فيه ؟ لأن هاليومين حايشني حارج


عاجل : يا أخي صوتك مألوف وايد كأني أعرفك عدل ممكن أتعرف؟


الرئيس : أنا بوعبدالمحسن رئيس المجلس


عاجل : إيه عدل أنا أقول من كشخته الناس حبته


الرئيس : وأنت منو ما تشرفنا ؟؟


عاجل : أنا عاجل ولد أم عاجل ووظيفتي مدون بعد نص الليل


الرئيس : هذا أنت ايييييييه خل أسيف رقمك عندي .... المهم كلمني عن محل العصير وإذا تعرف منو صاحبه بعد قولي الله يخليك


عاجل : صاحبه منكم وفيكم .. هذي بنتكم صبحية زهدي وعندها مدونة بعد أسمها بنت الشامية يا ولد الحجية أما المحل والله يا بو عبدالمحسن انه يسوى طوايف فخفخينا بمصر يعني شقول شحشي ... ( مقاطعة من الرئيس ) .


الرئيس : لأميمتي شقول ؟ ... بعيد لكويت حبيبتي لكووووويت...( مقاطعة من عاجل )


عاجل : ملق على راسي تبيني أكمل ولا نغني أحسن


الرئيس : لا كمل كمل شكلي الحين بمر على محلك بس شنو اطلب شنو عندهم


عاجل : بو عبدالمحسن السر في التنويع والابتكار يعني عد وخربط الجماعة ما خلو شيء خبرك صبحية راعية عرات وأفكار حلمنتيشية درجة أولى مثلا خذ عند آخر صرعة مشروبات على بعض أسماء نواب الدائرة الثانية وتناسب الحالية المزاجية للزبون


عدنان تعال همزني وهذا عصير خلطة كيوي مع ماي لقاح ومسحوق كاكاو يستخدم إذا كان الواحد مستانس وايد


في عندك


حمني طمني وهو عصير ناريل مخلوط مع نستله حاجم وهذا حق تسليك الصوت ويشرب لما الواحد يمر بحالة الأحلام الوردية


سلوى سكتي : وهذا كوكتيل سياسي بدون تسييس ومخلوط بكافور وهذا يطلب حق اللي يتكلم ويغلط وكل ما حاول يرقعا يطيح زيادة وهكذا


علي تلاوين : إذا حبيت تغير اشياء ما كنت تقدر تغيرها قبل هذا العصير يشجعك وايد ومكوناته أربع ملاعق بودرة عصير برتقال تانج مع أربع ملاعق بودرة عصير منجا تانج وأربع كاسات ماء بارد باكيت دريم ويب شراب فيميتو مركز


زوكا البازوكا : وهذا كيوي مع مانجا وحليب وكريم قشطة مع ملعقتين عسل


جيمي حربتشينو : وهذا هوت موكا ينزل خاص في الشتا مع كريم شانتييه


بوليد بالطريج : هذا عاد عصير خاص برجال الأعمال وهو فانيلا بالموز


دمتري وضحة : هذا عصير شعير عادي كلش بدون حتى إضافات وهو مفيد لتفتيت الحصوات


وأخيرا عصير بروك الأخضر : وهو عصير اخضر ضخم مكون من التفاح الأخضر مع حلوى الكراميل وهو مفيد للراغبين بزيادة الوزن


الرئيس : خوش خلطات بس انزين قولي شنو المشروب اللي على أسمي ؟


عاجل : ما أقدر أقول إلا بعد ما تعطيني الأمان


الرئيس : عطيتك


عاجل في قلبه ( إيه هين ) : العصير اللي بسمك هو جاسم مساج وهو اسمك الأول وعكسه وهو عصير خلطة التفاؤل ومكون من دونات بالأفوكادو


الرئيس : شـــوكرا عاجل على هالمعلومات أنا بصراحة حبيتك وايد ونصيحتي لك روح أشتر من محلك بسرعة لأنه باشر راح يصير مطعم هندي ولا تقول ما قلت لك


عاجل : أفا بوعبدالمحسن خبرت عندك روح رياضية شدعوة برنامج صوتك وصل ما قصر فيك والحين منت متحمل اسم عصير؟؟

20 comments:

enter-q8 said...

شوف انا طالب هالخشم ما تكتب بوستات بعد اليوم الا بنص الليل
و ربك يا عاجل مستعسر حدي مالي خلق دنياي
الله يفرجها عليك مثل ما فرجتها علينا

عين بغزي said...

ممكن عصي جاسم مساج ؟؟؟
بجم ؟؟؟

لووووووووووول
اليوم أبدعت عاجل

bo bader said...

وباجي الدوائر ما عندهم محلات عصير !

تدري شلون :

يشتري الخرافي المحل ويضمه لمجموعة امريكانا ويفتح له فروع في كل المناطق .

الطلب زايد هالايام على هالخلطات

مشكور ونستنا بالبوست

حنطفيس said...

عالاقل بوعبدالحسن خذا وعطا معاك
لو الرئيس الرمز السابق للأبد بوعزوز جان اتهمك انك خاين وانبطاحي وبوق ومأجور .. بس لأنك داق بالغلط !!؟

Sami said...

شوقتني ...مشتهي علي تلاوين

جبريت said...

والله طلع بو عبدالمسن على المشتهى اذا كنت من ربعه قالك وسو لك عصير مرزوق وناصر وربعه ويقول مو انا الي ما يوقف مع حريات الناس

عطنا من عصير عدنانو معاك بالطريج

خُــنْــزُب said...

الله يعطي بو عبدالمحسن الصحه و يعطيه
العافيه ، في ما يقوم هو و عائلته الكريمه
من خدمة لاهـــــــــــل الكــــــــــــويت
.

بنت الشاميه said...

من الصبح ادور لك على شيئ أقرقصك
فيه ...ماني لاقيه
هههههه
بس كله يجمع بالاخر
يوم انك تبي اسرار رخص دكاكين الجمعيه
الحين تقدر على الرئيس
ما تقدر على راعية محل الكيك
فيك خير حاج رئيس السن
وعلى علينا احنا مالنا الا الخياط
بس والله الواحد بدا يشك ما يندرا رخصة الخياط من حقه
؟؟؟؟؟؟؟؟؟
على فكره ترا الكيك مو اسلامي
ليش ما تجرب عندنا بالشاميه
وتنبر بمطاعم اللى على الدوره
تشووووف العجب

((:

why me said...

LOL


ابي عصير ليمون
;p

عاجـل said...

Enter-Q8

ابشر بسعدك مع اني مو غاوي
قصص خيالية لانها تذكرني بكوكب ساسون

عاجـل said...

عين بغزي

2 دك

عاجـل said...

bo bader

عندهم بس انا ما اقدر اروحهم كلهم

عاجـل said...

حنطفيس


حلم يبا حلم ولا من صج الرئيس يرد بنفسه على التلفون

عاجـل said...

Sami

عليه طلب

عاجـل said...

جبريت

هذا جديد شكله

عاجـل said...

ارويـــــــــــــــن


أمين يارب

بس شنو قدم للكويت عشان نعرف لان خبري اغلب مشاريعه برا الكويت

عاجـل said...

بنت الشامية

ماراح تلقين شيء صدقيني
اما سالفة الخياط
ودي ودي أصدق
شكلك دايرة على الشامية مول كله

عاجـل said...

why me

افا عليك كل عصار المحل
على حساب بنت الشامية

Unknown said...

م ب د ع

الراية said...

خخخخخخخخ ابداع ياعاجل

وعطني واحد حربتشينو

بس الرئيس ماقالك متى راح يتم طرح اسهم المطعم الهندي اللي مكان محل بنت الشامية صاحبة الخلطات المميزه